حئكايه


او گئجه ني غزل گيلده قوناق ايديم . ائولريني تانيميرديم . اَليم ده تكجه بير آدرس وار ايدي. اؤز دئدي يي كيمي دوغوم گونو اوچون بالاجا بير شادليق تؤره ني ايدي. غزلي نن بير فاكولته ده درس اوخودوغوموز اوچون ، ايسته ر – ايسته مز هردن گؤزلري ميز بير – بيرينه ساتاشيب زامان اؤتدوك جه آراميزدا بير تانيش ليق يارانميشدي. ايلك دانيشيغي ميزدا بير سينَما سالونون دا اولموشدي. " تولستوي " ون " آناكارنينا " آدلي رومانيندان چكيلميش فيلمي بياض پرده ده ايز له مك اوچون چوخ تصادوفي حالدا بير – بيريميزه راس لاشماق كيمي بير زاد . غزل ، يونيوئرسيته ده تئاتر يؤنه تمن لي يي اوخوياركن من ده يوكسك ليسانس اؤيره نجي سي اولاراق ادبيات اوخويوردوم . ندنسه غزلي هر گؤردوك ده اوره ك دؤيونتولريمي توتا بيلميرديم و اونون باخيش لارينا گؤز تيكه ركن، اودا مجبور اولمادان دوردوغو يئردن چكيلميردي. من اؤزومو اونا واله و وورغون حيسّ ائده رك غزل له دانيشماغا نه بير سؤز تاپا بيليرديم نه ده بير باهانا . آمما او ، سينما سالونوندا فيلمين باشلانماسي نا خاطير اينتيظار چكي ييميز آنلاردا ، آراميزدا سوكوتو سينديريب گولر اوزله " گؤزلرين دانيشسادا هئش واخ سسيني ائشيتمه مي شه م " دييه اَليم دن ياپيشيب آديمي سوروشدي. آديمين " روشن " اولدوغونو بيله ركن اودا آديني ، سوي آديني ، سئودي يي رنگ لري ، گول لري و عقرب بورجوندا دوغولدوغونو آنلاداركن دوسجا ياشاماغيميزي ايسته دي :

" يولداش اولاراق يالنيز ليق لاري پايلاشاق كي سونوندا يا ائوله نه ريك يادا عشقين و سئوگي نين داديني چيخارداراق گوله – گوله هره اؤز يولوموزاگئده ريك "

غزل بير نئچه آن ايچره اوره يينده هر نه وارسا بوشالداركن اونون جسارتينه حئيران قالاراق تئلفون نومره سيني وئردي.

غزلي آرتيق تانيديق جا حيسّ ائتديم او منيم آيريلماز بير پارچام ايدي كي ايندي يه جان اونسوز كاميل دئييل ديم . من اؤز ايچيمه جومان ، غم لي كدرلي ، استرس لي ، اوتانجاق و خلوتي سئوه ن بير آدام ايديم و او بير ياشام بومباسي كي هيجان و سئوينجي له مني اؤز دونيام دان آييريردي.

غزل قاپيني اوزومه آچديق دا اَليم ده كي گول دسته سيني آليب قوخلاركن هئچ بير قالاباليق گؤرمه دن دورو خوب شاشديم . آنجاق اونا " اييي كي دوغدون " دييه ائو سكوت ايچره جانسيز ايشيق لار لا دالغالانيردي. او مني گؤرجك پيانويا ساري گئديب نغمه لر قاناد آچدي . غزل له باش باشا يالنيز اولاراق ، اونون پيلَك لي مونجوق لي ماوي بير دون ايچره نه قَدَر گؤزل گؤرونمه سي منه بير رويا كيمي گليردي. او يام ياشيل گؤزلري له منه اورمان لاري خاطير لاداركن سانكي آياقلاريم يئردن اوزولموش كيمي ايدي. غزلين بئله نكي بير سورپيرز له مني قارشيلاماسي و بئله بير شاعيرانه حيسِ لري ايچيمه آخيتماسي ، منه داهادا چوخ عجيب گليردي. دوغوم گونو اوچون آي اولدوز لي بير كئيكي منيم اَل لَريم دن ياپيشاراق بيرگه كسمه ميز و ييرمي ايلي گؤسته ره ن عطيرلي يانان شام لارين آلاويني وار گوج ايله بير آندا پوفله مه سي ، منه سعادت دولو آنلار ياشاداراق باشلاديق رقص ائتمه يه . غزلين گؤزلرين ده دنيز لرين درين لي ييني و اونلارين چئشيدلي رنگ لره دوشمه سي ني دوياركن ، عشقي دوشونوردوم كي بير آن دا هر يئر ايشيقلاندي و اوزه ري ميزه چيچك سَپي له رك ، ايكي نفر اَل چالاراق ايره لي گلديلر. غزل ين آتا آناسي ايديلار و مني اؤپوپ باغري لارينا باساراق غزله تبريك دئييب بير كادو وئرديلر . قيزيل لي الماس لي بير آغ قوش ايدي كي اونوبير زنجيردن آساراق بوينونا سالديلار . بو آندا بير پارا جوان اوغلان و قيزدا ايچَري گيريب غزل له مني دؤوره لر كن چال چاغير و شن ليك سسي ائوي بورودي. سونرا هاميني يئمه يه دعوت ائديب كئچديك دال حَيَط ده كي صفالي بير باغچا يا . غزل مني قرارسيز گؤره رك دئدي :

" آرادا بير آزچيلغين ليق ياشا سادا مني باغيشلارسان ."

سونرا اوغلان لي قيزلي دانسا گيريب جينسئل جاذيبه لرله اَل آياق اويناداركن بير دن بيره غزلي اؤزون دن چيخميش گؤروب چكديم كنارا . الكل ، توستو وكريستا ل تك پارلايان شيشه توزلاري اَل اَله گزه ركن قافام ائله قاريشميشدي كي سانكي بو دونيا دا دئييله م . آنجاق هله غزل ايله بيرگه او دوروم دان بير نئچه آدديم اوزاقلاشماميشديق كي بير دن بيره باشيم دا بير شوشه سينيب گيجه لر گن اوتوردوم يئره . اؤزومو تاپديقدا باشيم دا بولور بير گولدان سينسادا قان آخماسينا باخمادان اوردان آيريلديم . دئمه كي من غزلين بير اوغلان لا دانس ائتمه سينه مانع اولونجا اونو ن حالين توتموشام و اودا بئله نكي بير ايشه اَل آتيبدي.

غزل دفعه لرجه گؤروشومه گلسه ده ، اونو بيرسئوگيلي كيمي يوخ بلكه بير دوست كيمي قارشيلاييب صميمي باغلانتي لاريما سون وئرمك ايستيرديم . غزل له منيم فرق لي دونيالاريميز وارايدي. عائيله طرزيميز و چئوره لريميز فرق لي اولاراق بيز ادب ، تربيت و شرف سايديغي ميز شئي لر اونلارين گؤزون ده بير تَهَر كؤهنه عادت لر ايديلر .

عشقه ، گؤزل لي يه، كولتوره ، هُنره و بير پارا دويغولارا دَ يَر وئردي ييم حالدا ، غزلي گؤرمك دن چكينديم و يونيورسيته ني بتيرديكده چيخديم گئتديم سربازليقا . آنجاق هر نئيله سم ده غزلين ياشيل گؤزلري اوجسوز بوجاقسيز اسرار انگيز بير جنگل كيمي هئي ياديما دوشوردي. آنا كارنينا فيلميني ايزله دي ييميز آنلار ياديما دوشوردي و غزلين دئدي يي سؤزلر ظولمته چئوريلميش دونياما ايشيق ساچيردي:

" دوغرو عشق و محبت، قيغيلجيم قَدَر سيجاق و اينجه اولسادا، يئنه كؤنول لري مقدس آلاولار كيمي قيزيشديرا بيله ر. "

آنلاميشديم كي اينسان سئوگي اوغروندا اوزاق لارا قاچسادا ، اؤزون دن و كؤنلون دن قاچابيلمه ز.

بير گون آنام تئلفون آچيب داريخديغيني دييه رك من دن ايسته دي كي بير نئچه گون مرخص ليك آليب گله م ائوه . بير ايكي گون كئچميش دي كي بير گئجه اوتوبوس لا يولا چيخيب صوبح اذاني اولدقدا چاتديم شَهريميزه . عائيله دن نيگران اولورسام دا اونلاري ساغ سلامت گؤردوك ده اوره ييم يئرينه گلدي. آمما هاننان گئژدن ائشيتديم كي غزل كسيك دامارلاري ايله خسته خانادادي و اينتحار دان قورتولونجا ايلك ايسته يي مني گؤرمك اولوبدور.

غزلين سولغون باخيشلاريني گؤرجك ،َاَل لريني اَليمه آليب گؤزلريمين ياشيني توتا بيلمه ديم . سونرا اونو هله ده سئودي ييمي آنلاديب بو عشقي ياشاياراق ياشاتما غا سؤز وئرديم . بو آن دا غزلين بستري اولدوغو اوتاغا بير داهادؤنوب باخاراق گؤردوم كي تكجه ايكي ميز قالميشيق و نه دن سه ، هامي قويوب گئديب لر.

1384