اورکیم عشقینی باشدان آتا بیلمز
بیر قاریش تورپاقینی دونیایا هئچ واخ ساتا بیلمز
ئوزونو ئوزگه لره هئچ قاتا بیلمز
سنسیز اولسا یاتا بیلمز
اولو تبریز!
آی آنا!
شهریار تک بالا لار ایندی یاتیبلار قوجاغیندا
اورکیم قوش تک اوچوبدور اوتوروبدور بوداغیندا
دونیانین غملی چاغیندا
منی میندیر او گؤزل قونقایا تبریز!
یئنه تاریخده دولاندیر
یئنه ده عالمه ستار خانی قایتار
قورویوبدور داهی غیرت داماری گل قانی قایتار
ئولو جیسمه جانی قایتار
الینی قاوزا گؤیه گؤیده کی پروین لری گؤستر
اورکیم آیریلیقا بیل کی دؤزنمیر
الینی سندن اوزنمیر
ئوزگه بیر ئولکه ده سنسیز لی گزنمیر
سنی گؤردوم
باخیشیم بیر گونش اولدو
سویا باخدیم سو ایشیقلاندی دولاندی
گؤزو یومدوم سو کدر لندی دایاندی
بیلمیرم سنده نه وار؟
بلکه یاشام بلکه باهار
بلکه ده بیر اورکی غمله پیچاقلانمش نار...
قورخورام سنسیز اولام شعریمی تئز شاختا وورا
نفسیمده دونا قارشیمدا دورا
قورخورام اولمایا بیر کس
بو گؤزل شعر اوجاغین بیرده قورا
دی نسیمی دریسین اوستومه چکسین
قویما شاعیر دیزه چؤکسون
شهریار ئولکه سی سن
ادبین شانلی داغی چال پاپاغی ائل دایاغی
یول قارانلیقدی گؤرنمیر اورکیم
شمسه دی ساچسین ایشیق یوللاریما
دونیا شاعیرلری سندن هله الهام آلاجاقلار
صائبیندن اوخودوقجا
قلم الدن سالاجاقلار
بو نه سیردیر قالاجاقلار
دوزدو کی یئللر اسنده
نازلی گوللر قانینا هی بو یانیبسان
آمما ارگین تکی هیبتلی کولکلر قاباغیندا دایانیبسان
اولو تبریز!
ائلیمین سئومه لی گؤیچک گؤلی سنده
داملادیر هرنه گؤزللیک سئلی سنده... سئلی سنده...
آخ ....گؤزللر ائلی سنده
سنسیز اولسام دییرم
باشقا دیلک وارسادا زای دیر
ایچدییم بیر آجی چای دیر آجی چای دیر
هانسی گؤیچک سنه تای دیر؟
هانسی گؤیچک سنه تای دیر؟
